Y Dirprwy Arch-dderwydd wedi marw

Bu farw'r Dirprwy-Archdderwydd Selwyn Iolen ar 10 Awst 2011. Bu'n Archdderwydd o 2005 i 2007 ac fe gamodd i'r adwy pan oedd Dic yr Hendre yn anhwylus yn 2009.

Talwyd teyrnged i Selwyn Iolen gan yr Archdderwydd, T. James Jones, "Roedd yn ŵr parod ei gymwynas, hwyliog a dawnus. Roedd e'n Archdderwydd diymhongar iawn ac yn gwneud yn siwr ei fod yn cadw'r sylw ar yr enillydd drwy'r amser yn seremoniau'r Eisteddfod. Mae'n cydymdeimlad ni'n fawr â Meira, ei briod, a'i fab Euron."

Ymddeoliad Siân Aman

Hoffem dalu teyrnged a diolch i Siân Aman am ei hymroddiad a’i gwaith di-flino i’r Orsedd drwy’r blynyddoedd—yn wir dros chwarter canrif o wasanaeth! Dymunwn yn dda iddi hi (a Huw ei gŵr), wrth iddi ymddeol o’r swydd bwysig hon ar ddiwedd y brifwyl eleni.

Trefnydd Cerddoriaeth

Yn dilyn ymddiswyddiad Allan Cennech fel Trefnydd Cerddoriaeth Gorsedd y Beirdd, penodwyd Cefin Roberts yn olynydd iddo am y tymor nesaf o dair blynedd.

Diolchwn i Allan Cennech am ei holl waith ar ran Gorsedd y Beirdd dros y blynyddoedd dwytha a dymunwn bob llwyddiant i Cefin wrth iddo ymgymryd â’r swydd.

Cyhoeddi Eisteddfod Bro Morgannwg

Cafwyd croeso arbennig gan bobl Bro Morgannwg ar Ddydd Sadwrn 25 Mehefin. Daeth cannoedd o bobl i wylio’r orymdaith ac i fwynhau seremoni’r Cyhoeddi - ac erbyn i’r prynhawn gyrraedd, roedd yr haul yn gwenu.

Newyddion o'r Cyfryngau

Archdderwydd yn talu teyrnged i Selwyn Griffith

Selwyn Griffith wedi marw

Archdderwydd am weld Papur Dyddiol

Degawd o Chwarae'r Cyrn

Meistres y Gwisgoedd am y tro olaf

Fe fydda i'n ôl

Meistres y Gwisgoedd yn Ymddeol

Cyfyngu'r wisg wen i brifeirdd a phrif lenorion

Cymdeithasu yng Nghastell Deudraeth

Ddydd Sadwrn, 17 Medi, 2011 daeth yn agos at hanner cant o aelodau’r Orsedd o bob rhan o Gymru at ei gilydd i Gastell Deudraeth, Penrhyndeudraeth, ar gyfer ein hail achlysur cymdeithasol blynyddol a drefnwyd gan Yr Arwyddfardd, Dyfrig ab Ifor. Yn awyrgylch unigryw a thrawiadol y castell Fictorianaidd a brynwyd gan Syr Clough Williams-Ellis yn 1931 (taid y perchennog presennol, y Prif Lenor Robin Llywelyn), cafwyd cyfle i glywed hanes yr adeilad a’r ystad gan Robin ei hun, cyn mwynhau orig ddymunol yn cymdeithasu uwch pryd hyfryd o fwyd.  Croeswyd pawb yn gynnes gan yr Archdderwydd Jim Parc Nest, ac wedi gorffen gwledda cafwyd cyfle i grwydro o gwmpas gerddi’r Castell ynghyd â mynd i lawr i bentref hynod Portmeirion i fwynhau’r golygfeydd a’r bensaerthiaeth hynod.
Diolch i’r Prif Lenor Robin Llywelyn am ein croesawu i’w ‘gartref’ ac i Dyfrig ab Ifor am ei drefniadau manwl a gofalus (gan gynnwys sicrhau digon o ysbeidiau heulog ynghanol diwrnod o gawodydd trwm !). Os oes gan unrhyw aelod o’r Orsedd syniadau am leoliad addas ar gyfer cymdeithasu y flwyddyn nesaf, byddai Bwrdd yr Orsedd yn falch iawn o glywed gennych.
Gwyn o Arfon.

Meistres y Gwisgoedd Ela Cerrigellgwm

Cyhoeddwyd ar y 1af o Chwefror 2011, mai Ela Jones - Ela Cerrigellgwm, fydd yn olynu Siân Aman fel Meistres y Gwisgoedd Gorsedd y Beirdd am y cyfnod hyd at 2013.

O Ysbyty Ifan ger Betws y Coed y daw Ela, a urddwyd i’r Orsedd er anrhydedd yn Eisteddfod Blaenau Gwent a Blaenau’r Cymoedd y llynedd, am ei gwasanaeth fel gwiniadwraig, cynllunydd a gwneuthurwraig. Fe fydd yn cysgodi Siân Aman yn y gwaith ar y cychwyn, wrth iddi ymgyfarwyddo â dyletswyddau Meistres y Gwisgoedd. Dymunwn bob llwyddiant iddi yn y gwaith.

Cyfarfod Cymdeithasol

Cynhaliwyd y cyfarfod cyntaf o’i bath yn Y Senedd yng Nghaerdydd ym mis Medi 2010. Daeth nifer fawr o Orseddogion i’r cyfarfod ac fe drefnwyd taith o amgylch yr adeilad, gyda lluniaeth i ddilyn. Ynglŷn â’r dyfodol, awgrymodd y Gorseddogion oedd yn bresennol, y byddai’n ddymunol cynnal yr ail gyfarfod ym Mhortmeirion. Gall Castell Deudraeth dderbyn hyd at 100 o bobl a chytunodd y Bwrdd â’r awgrym. Drwy garedigrwydd Robin Llywelyn cynhelir yr ail gyfarfod felly yng Nghastell Deudraeth 17 Medi 2011.

Llongyfarchwyd yr Arwyfardd ar drefniadau’r ymweliad â’r Senedd.

Creiriau’r Orsedd

Estynnwn ein diolchiadau diffuant i Calvin a Marilyn Rees o Sain Ffagan am eu gwasanaeth arbennig i’r Orsedd, wrth i’r ddau ymddeol o’u dyletswyddau. Y tu ôl i’r llenni, bu’r ddau yn gofalu am, a chludo’r creiriau o Eisteddfod i Eisteddfod am flynyddoedd a diolchwn iddynt am eu gwasanaeth. Mater o lawennydd yw cael cyhoeddi y bydd eu merch Cathryn yn ymgymryd â’r dyletswyddau hyn o eleni ymlaen.

Cysylltiadau Celtaidd

Adroddiad Swyddog y Celtiaid 2011, Mererid

Yn gyntaf, diolch i bawb o Fwrdd yr Orsedd a wirfoddolodd i’n cynrychioli ni yn y Gwyliau Celtaidd eleni eto. Yn ôl yr adroddiadau, derbyniodd pawb groeso cynnes gan ein brodyr a’n chwiorydd dramor, ac mae’r teimlad o agosatrwydd yn parhau. Heb os, mae gennym ni fel Cymry rôl bwysig i’w chwarae yn annog a chodi calon y rhai sy’n ymdrechu’n ddiflino, mewn amgylchiadau hyd yn oed llai ffafriol na’r rhai sydd gyda ni yng Nghymru, i gadw’r diwylliant a’r ieithoedd lleiafrifol yn fyw. Da gallu nodi bod pethau’n bywiocau yn Ynys Manaw, a thipyn mwy o drefn a llewyrch ar y gweithgaredd yno’r dyddiau hyn ymddengys. Yn y cylch hwn o ymweliadau, dyma ddau dabl yn dangos y cyfnewid: