NOD I FEIBION A MERCHED CYMRU

Bwriadwyd Arholiadau'r Orsedd fel symbyliad i waith ac fel safon i fesur cynnydd wrthi. A pha deilyngach uchelgais i ieuenctid Cymru nag ymgymhwyso yn yr efrydiau hyn modd y gallont ddyfod i mewn i Lys yr Eisteddfod Genedlaethol trwy borth anrhydeddus Arholiadau'r Orsedd?

Ceir meysydd llafur mewn barddoniaeth neu lenyddiaeth neu gerddoriaeth, a meysydd arbennig eraill i delynorion a datgeiniaid gyda'r tannau. Rhaid pasio dau arholiad yn eich pwnc dewisedig cyn y byddwch ar dir i'ch urddo yng Nghylch yr Orsedd gan yr Archdderwydd, ond gellwch gymryd y ddau bapur yr un diwrnod os dewiswch. Yna ymhen blwyddyn arall, cewch sefyll yr arholiad terfynol - Bardd, Cerddor, Llenor.

Cynhelir yr arholiadau ar y dydd Sadwrn olaf o Ebrill bob blwyddyn mewn canolfannau hwylus yn Ne a Gogledd Cymru, a rhaid i bob ymgeisydd anfon rhybudd o'i fwriad i sefyll cyn 1 Mawrth i Drefnydd yr Arholiadau. Ganddo ef cewch am 50c (a chludiad) lyfryn hwylus yn rhoddi i chwi gyfarwyddiadau Ilawn am y gwahanol feysydd Ilafur a'r amodau, ynghyd ag enwau arholwyr, a'r rhestr werslyfrau.

Anfonwch ar unwaith, er mwyn dechrau mewn da bryd, i'ch urddo yn Eisteddfod Genedlaethol y flwyddyn nesaf.

Y mae Tystysgrif yr Arholiadau yn un o'r rhai harddaf a luniwyd erioed. Gwnaed hi'n arbennig ar gyfer yr Orsedd gan artist Cymreig, R. L. Gapper, ac y mae'n arddangosiad y gellwch ymfalchïo ynddo ar hyd eich oes. Ond mwy na hynny fydd yr etifeddiaeth deg a enillwch trwy'r cwrs o hunanddiwylliant a'r fraint o'ch urddo ar gyfrif hynny yn aelod o'r Orsedd.

ARHOLIADAU GORSEDD Y BEIRDD

Gyda’r Eisteddfod Genedlaethol yn dod i Gaerdydd y flwyddyn nesaf, beth am fynd ati dros fisoedd y gaeaf i baratoi ar gyfer sefyll arholiadau’r Orsedd, a thrwy hynny ddod yn aelod o’r Orsedd a chael cymryd rhan yn ei seremonïau a’i gorymdeithiau lliwgar ?

Cynhelir yr arholiadau ar y Sadwrn olaf yn Ebrill a gallwch ddewis o blith nifer o feysydd i arbenigo ynddynt: Barddoniaeth, Cerddoriaeth, Iaith, a Rhyddiaith, ynghyd â meysydd arbennig i Delynorion, Datgeiniaid Cerdd Dant, ac Utganwyr. Rhaid pasio dau arholiad yn eich maes dewisedig cyn cael eich urddo i’r Wisg Werdd, ond gallwch sefyll y ddau bapur yr un diwrnod, os dewiswch.  Yna, ymhen blwyddyn wedyn, cewch sefyll yr arholiad terfynol i’ch urddo i’r Wisg Las.

Os hoffech fwy o fanylion am yr arholiadau, cysylltwch â mi cyn gynted â phosib yn: Llys Cerdd, 80 Cae Gwyn, Caernarfon, Gwynedd, LL55 1LL        (e-bost:  wgwyn.lewis@btinternet.com)

Beth am roi cynnig arni, felly, er mwyn i chi gael bod yn rhan o seremonïau Gorsedd y Beirdd yn yr Eisteddfod Genedlaethol yng Nghaerdydd y flwyddyn nesaf ?

Yr eiddoch yn gywir

Dr W Gwyn Lewis (Gwyn o Arfon)

Trefnydd Arholiadau Gorsedd y Beirdd

GAIR IOLO AR GYFRIFOLDEB AELODAU'R ORSEDD I HYFFORDDI'R YMGEISWYR

'Bod yn bont i bawb yw'r ddyled sydd ar Fardd Gorseddawg, sef addysgu'r disgyblion gan eu dwyn dros gors anwybodaeth a bod yn llwybr a phont iddynt.'